Teater: Sü Ü

La gruppa da teater Scuol preschainta dürant las ultimas duos fins d’eivnas da november üna cumedgia dramatica cul titel «Sü Ü». Il toc han sviluppà las acturas ed ils acturs svessa insembel culla redschissura professiunala Annina Sedlacek. Il toc imprometta tensiun, conflicts e blers mumaints da rier.
Far üna gita e lura pernottar in chamonna – quai ha la taimpra dad aventüra, da romantica o l’impromischiun da quietezza dalöntsch davent da la civilisaziun. Mo che capita scha differentas persunas chi nu’s cugnuoschan sun dandettamaing serradas aint in üna chamonna, sainza savair cura e scha insomma ch’ellas rivan darcheu da tilla bandunar? Precis in quista situaziun as rechattan las protagonistas ed ils protagonists dal toc da teater «Sü Ü». Pella rapreschantaziun da quist on ha bandunà la Gruppa da teater Scuol sia zona da confort. Impè dad imprender text per üna rolla dad ün toc da teater existent, haja gnü nom: Nus sviluppain svessa ün toc. Sustegn han las acturas ed ils acturs laics survgni dad Annina Sedlacek. La Sentinra ha absolt la scoula da teater Accademia Dimitri a Verscio i’l Tessin e lavura sco redschissura ed actura professiunala. «Üna creaziun collectiva significha eir cha la creatività da minchüna e minchün vain promovüda e cun quai daja üna grond’ouvra d’art», disch la redschissura