Webcams 
WhatsApp 
Veranstaltungen 
Gutscheine 
Wetter 
Hinweise und Sperrungen Medienmitteilung 19.07.2021
Comunicaziun da las medias: Onur per la Rumantschia – Cusglier federal Ignazio Cassis imprenda rumantsch a Scuol
Chi chi sa rumantsch, sa daplü.
Il cusglier federal Ignazio Cassis ha dat il bivgnaint hoz, ils 19 da lügl 2021, pell’eivna dals cuors intensivs da rumantsch organisats da la Lia Rumantscha a Scuol. Sün invid da la Lia Rumantscha e da la regiun da vacanzas Engiadina Samignun Val Müstair insembel cul cumün da Scuol, s’ha partecipà il schef dal departamaint d’affars exteriurs (DFAE) persunalmaing a las prümas lecziuns dals cuors da rumantsch vallader. L’eivna dals cuors intensivs da rumantsch es minch’on fich bain frequentada e spordscha ultra dals cuors da lingua ün’invista illa cultura rumantscha da l’Engiadina Bassa.
Davant passa 120 partecipantas e partecipants e manadras e manaders dals cuors sco eir giasts da la politica e da l'economia da la regiun e dal chantun Grischun, ha drivi il cusglier federal Cassis l’eivna dals cuors. Quai ha’l fat in trais linguas, nempe per talian e per tudais-ch e cun ün pêr frasas per rumantsch. Eir il capo da cumün Christian Fanzun ed il cusglier guvernativ Jon Domenic Parolini han drizzà il pled als preschaints.
«Nus ans sentin onurats, cha’l cusglier federal Ignazio Cassis ha demuossà l'interess per imprender la lingua rumantscha e ch’el ha realisà quist’intenziun ed es gnü per quel motiv a Scuol», uschè Diego Deplazes, il secretari general da la Lia Rumantscha davart la visita prominenta da Berna.
L’avertüra ufficiala es gnüda inramida cun chanzuns rumantschas dal chantadur principal indigen da la band «Rebels», Flurin Bezzola. In seguit ha tuot pudü giodair ün aperitiv cun specialitats localas.
Exprimi ün giavüsch ed acceptà l’invid
Siond cha’l cusglier federal Cassis vaiva express l’interess d’imprender rumantsch, han la Lia Rumantscha e la regiun da vacanzas Engiadina Samignun Val Müstair insembel cul cumün da Scuol til invidà da’s partecipar ad ün dals cuors intensivs a Scuol. Il schef da la DFAE chi’d es da lingua materna taliana, vaiva inizià insembel cul chantun Grischun la prüma «Emna Rumantscha», a la quala s’han partecipats numerus rapreschantants svizzers pel exteriur. «L’emna rumantscha» dess render attent a la quarta lingua ed a la multifarietà linguistica da la Svizra.
Da ses collegas dal Cussagl federal a nouv collegas da classa
Il cusglier federal Ignazio Cassis ha imprais illa chasa da scoula da Scuol dürant l’avantmezdi in ün cuors da crash d’ün mez di insembel cun nouv «cumpogns e cumpognas» ed üna manadra dal cuors versada noziuns dal minchadi in vallader. Diego Deplazes s’ha eir partecipà a l’instrucziun: «Signur Cassis ha üna fich buna pronunzcha ed ha imprais infra cuort temp frasas e pleds ütils chi sun adattats pel minchadi. Nus eschan cuntaints d’avair pudü dar sün via cul cuors a signur Cassis ün «insaj» da la lingua rumantscha». E plünavant: «Ch’ün cusglier federal imprenda alchünas frasas rumantschas demuossa cha la Confederaziun ha ün vair interess pels bsögns da la lingua periclitada», es Deplazes persvas.
Ils nouv collegas da classa dal magistrat rapreschaintan fich bain als passa 100 partecipants e partecipantas dals cuors. Da la partida d’eiran nempe duos duonnas da la Svizra francesa, ün pêr Grischuns chi’s laschan increscher da l’Engiadina nouvdomiciliats plü giuvens chi han decis da viver in Engiadina.
Per surgnir eir ün’invista illa cultura rumantscha, esa gnü organisà tenor il motto «Il prüm la lavur e lura il giodimaint», ün gir cun üna pitschna delegaziun intuorn il cumün da Scuol. Là ha il cusglier federal Cassis pudü degustar in preschentscha d’üna sommeliera d’aua l’aua minerala, per la quala il cumün da Scuol es cuntschaint.
«La lingua rumantscha es üna part da l’identità da la cultura da l’Engiadina Bassa. Ella es integrada illa natüra unica intuorn il Parc Naziunal Svizzer sco eir i’ls cumüns engiadinais bain cultivats e dvainta uschè ün evenimaint palpabel ed autentic per noss giasts. I nun es dimena da’s dar da buonder cha uschè bleras persunas cumbinan l’imprender la lingua cun vacanzas in nossa regiun», uschè la directura da turissem Engiadina Samignun Val Müstair.
Ed alch es sgür: Scha’l cusglier federal Ignazio Cassis tuorna darcheu üna jada illa regiun dal Parc Naziunal Svizzer, survegna’l bleras pussibiltats d’applichar quai ch’el ha imprais, saja quai illas giassas, süllas plazzas o i’ls affars dals cumüns da l’Engiadina Bassa. La cultura rumantscha, las tradiziuns e la lingua vegnan nempe vivüdas al lö consciaintamaing e cun superbgia. Tuot tenor il motto «Chi chi sa rumantsch, sa daplü».
Über die Rätoromanische Sprache
Das Rätoromanische ist eine der vier Landessprachen der Schweiz. Sein Einzugsgebiet liegt im Südosten der Schweiz im Kanton Graubünden. Zahlreiche der rund 60‘000 Personen, die das Rätoromanische sprechen, leben ausserhalb Graubündens. Die Sprache ist seit dem 15. Jh. v. Chr. aus der Verschmelzung der vorrömischen Sprachen mit dem Volkslatein der römischen Soldaten, Beamten und Kaufleute entstanden. Es gliedert sich in fünf verschiedene regionale Varianten, auch Idiome genannt (Puter im Oberengadin; Vallader im Unterengadin und im Münstertal; Sursilvan in der Surselva; Sutsilvan hauptsächlich im Schams; Surmiran im Oberhalbstein und Teilen des Albulatals), sowie in zahlreiche Ortsdialekte. Die Sprache wurde im 16. und 17. Jahrhundert im Zuge der Reformation und Gegenreformation verschriftlicht und findet seit dem 19. Jh. auch Verwendung in literarischen Texten, in Presseerzeugnissen, in Volkskalendern, in der Schule sowie, ab Mitte des letzten Jahrhunderts, in den elektronischen Medien. Neben den Idiomen gibt es mit dem Rumantsch Grischun eine einheitliche Schriftsprache.
Quist es üna comunicaziun da medias ufficiala da la Turissem Engiadina Scuol Samignun Val Müstair SA (TESSVM) in collavuraziun culla Lia Rumantscha.
Davart la Lia Rumantscha
Daspö passa 100 ons i’l servezzan dal rumantsch
La Lia Rumantscha es gnüda fundada dal 1919 sco organisaziun tetala da tuot las societats da lingua e cultura rumantschas. Ella s’ingascha pel mantegnimaint dal rumantsch in famiglia, scoula, e publicità. Plünavant infuormescha ella davart la lingua e cultura rumantscha e cussaglia instituziuns, organisaziuns e persunas privatas. La Lia Rumantscha organisescha cuors, spordscha ün servezzan professiunal da traducziuns, maina il vocabulari online «Pledari Grond» ed edischa cudeschs per uffants e giuvenils. Sper la sedia principala a Cuoira dispuona la Lia Rumantscha da posts exteriurs a Glion, Clugin, Savognin e Scuol.
Davart il TESSVM
Il TESSVM es l’organisaziun turistica da marketing pell’Engiadina Bassa, Samignun e Val Müstair. Per incumbenza dals acziunaris promouva il TESSVM in prüma lingia sün chomp naziunal sco eir internaziunal la dumonda davart spüertas e prestaziuns turisticas. Il TESSVM es respunsabel insembel cun tuot ils acturs dals tschinch cumüns politics cun passa 20 lös da vacanzas per la spüerta da comunicaziun e la chüra da giasts. L’organisaziun cun sedia principala a Scuol lantschescha e coordinescha progets cumünaivels cun partenaris regiunals e cun portaders da prestaziun e garantischa l’accordaziun cun Grischun Vacanzas e cun Svizra Turissem. L’intrapraisa cun ün büdschet da circa 5.5 milliuns francs svizzers dà lavur a var 40 collavuraturas e collavuraturs in pensum cumplain ed in pensum parzial, dals quals duos sun praticants e praticantas e trais giarsuns e giarsunas. La regiun da vacanzas Engiadina Samignun Val Müstair contribuischa cun raduond 1 milliun pernottaziuns s-chars 10 pertschient da las pernottaziuns totalas dal Grischun.
Surtour respunsabiltà: CSR e la persistenza tridimensiunala
Corporate Social Responsibility (CSR) es la contribuziun facultativa dad intrapraisas per ün svilup persistent, pel qual l’obligaziun voluntaria sta i’l center. In quist connex agischa il TESSVM tenor il princip da la persistenza tridimensionala: economia, dumondas socialas ed ambiaint. Il TESSVM es neutral in reguard al clima as dond fadia da redüer sias emissiuns da CO2 e da cumpensar las emissiuns chi nu sun evitablas cun progets da protecziun dal clima da myclimate. Las cumpras vegnan fattas scha pussibel illa regiun e las incumbenzas vegnan surdattas a partenaris locals. Ill’intrapraisa svess promouva il TESSVM la generaziun giuvna cun plazzas da giarsunadi e cun praticums.
contacts pellas medias
Martina Stadler, directura
Tel. +41 81 861 88 02
m.stadler@engadin.com
Andreas Gabriel, manader Affars publics
Tel. +41 81 258 32 22
andreas.gabriel@rumantsch.ch
Madeleine Papst, manadra medias TESSVM
Tel. +41 81 861 88 15
m.papst@engadin.com
